- დევნილთა, ეკომიგრანტთა და საარსებო წყაროებით იძულებით გადაადგილებულ სააგენტოს ინფორმაციით, თბილისში, თვალჭრელიძის ქუჩაზე, დევნილი ოჯახებისთვის განკუთვნილი, თანამედროვე სტანდარტების შესაბამისი საცხოვრებელი კომპლექსის მშენებლობა დასკვნით ეტაპზეა.
უწყების ცნობით, საცხოვრებელი კომპლექსი 11 კორპუსს აერთიანებს, საიდანაც 4 კორპუსში სრულად გარემონტებული ბინები დევნილ ოჯახებს გასულ წელს უკვე გადაეცათ, 7 კორპუსის განაწილება კი რამდენიმე თვეში იგეგმება.
“სრულფასოვანი საცხოვრებელი გარემოს შექმნის მიზნით, ტერიტორიის კეთილმოწყობის სამუშაოები მიმდინარეობს, რაც გამწვანებას, სტადიონების, ბავშვთა გასართობი მოედნებისა და სავარჯიშო სივრცეები მოწყობას ითვალისწინებს.
ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე გიორგი ცაგარეიშვილი და დევნილთა სააგენტოს დირექტორი დავით კაიკაციშვილი დევნილი ოჯახების განსახლების მიზნით მიმდინარე სამშენებლო სამუშაოებს ადგილზე გაეცნენ.
მნიშვნელოვანია, რომ დევნილთა სააგენტო თბილისში ბინის მიღების მსურველი დევნილი ოჯახების მონიტორინგს ახორციელებს. მოკვლევის დასრულების შემდეგ, დევნილთა საკითხების შემსწავლელი კომისია, კანონმდებლობის სრული დაცვით, იმ ოჯახებს გამოავლენს, რომლებსაც ახალაშენებულ კორპუსებში ბინები გადაეცემათ.”-აღნიშნულია უწყების გავრცელებულ ინფორმაციაში.
ინფორმაციისთვის: თბილისის პარალელურად, დევნილი ოჯახების განსახლების მიზნით, მასშტაბური სამშენებლო სამუშაოები რუსთავში, ზუგდიდსა და ბორჯომში მიმდინარეობს.